Ginin Masallaci Mafi Tsada A Birnin Cambridge Da Ke Ingila

Ginin Masallaci Mafi Tsada A Cambridge Da Ke Ingila 
  
Daga Jimada M. 

Musulmi mazauna birnin Cambridge dake kasar Birtaniya suna wani gagarumin shirin gina wani Masallaci mafi tsada a birnin baki dayansa. Kamfanin dillancin labaran Alkur’ani na IQNA ya labarta cewa;
ya nakalto wannan labarin ne daga shafin sadarwa na yanar gizo na Cambridge cewa; wannan Masallacin gininsa zai lakume zunzurutun kudade har Fam Miliyan 15, wanda zai kasance mai fadi da wuraren ajiye ababen hawa, da wurin sallah da zai dauki mutane dubu. Hakazalika kuma wannan Masallaci zai kunshi fili a cikinsa da za a iya shuka kayan ganye da kuma dakin cin abinci, da kuma wuraren tace ruwa wanda ake amfani da su na zamani, wadanda dukkaninsu hanyoyi ne da za su iya kawo ma Masallacin kudin shiga.

Wasu daga cikin Musulmi daga jami’ar birnin na Cambridge ne suka gabatar da wannan shawara wadda kuma mahukunta suka amince da ita, inda yanzu haka an fara sayen Kekuna dubu 35 domin bayar da haya da nufin fara tattara kudaden aiki. Babban mai kula da shafin yanar gizo na shirin gina masallaci ya bayyana cewa za a iya ziyartar shafin domin ganin irin shirin da suke da shi, wanda dukkanin bayanai da kuma hotuna da aka saka na tsarin yadda Masallacin zai kasance duk suna aciki. 

Yanzu haka dai akwai kimanin Musulmi dubu 7 da suke rayuwa a birnin, kuma suna da Masallatai guda 5 da suke amfani da su.